ليلى بِنِت عُمُرها ٢٤ سَنِة. هي مِن إيطاليا، و ساكْنِه في مَدينة صغيرِة قَريبِة مِن البَحَر. لَيلى بِتْحِب السَفَر وبِتْحِب تِتْعلَّم اللُّغات. و أصلاً بتِحكي الإسبانية والإنجليزية، بس هي دايمًا كان نِفسها إنُّه تِتْعَلَّم اللُّغَة العَرَبية.

في يوم مِن الأيّام، شافَت إعلان عَن دَورة تَعليم اللُّغه العربية في الأردن. قَرْأت الإعلان أكْتَر مِن مَرّة، و تْحَمَّسَت كتير .

و حَكَت :

"ليش لأ ؟ هاي فُرصة حلوة."

و قَرَّرَت إنّها رح تْبَلِّش و بعد أُسْبوع، إشْتَرَت تَذْكِرة سَفَر، و بَلَّشَت تْجَهِّز حالها، و حَطَّت كُل أغْراضها (جَواز السَّفَر ، أواعي ، دَفْتَر صغير، و قَلَم، و كتير أشياء..) كانَت مِتْوَتّرة شوي ، بَس مَبْسوطه و مِتْحَمّسِه عَشان رَح تْبَلِّش تِتْعَلِّم لُغه و تَجْرُبِه جديده .
حَجْزَت تذكرِة السَّفَر ، و اخْدَت تَكسي و راحَت عالمَطار قَبِل مَوعِد الطيّاره ب ساعتين، المُهِم وِصْلَت المَطار و سافَرَت، وِصْلَت ليلى لَعَمّان في الليل، و أخْدَت تَكْسي و الجو كان لَطيف يعني مِش بَرد وَلا شوب. شوفير التكسي بَلَّش يحكي معها.

حَكالها :

أهلًا وسهلًا، وين بِدِّك تروحي؟

حَكَتلُه ليلى :

شُكراً، لَو سَمَحت بِدّي أروح على جَبَل الحُسين

وِصْلَت لَيلى و دَفْعَت مَصاري للشوفير و راح. دَخْلَت لَبيتها و حَطَّت كُل أغْراضها و جَهَزَّت كُل شي و نامَت.

في اليوم التاني، صِحْيَت ليلى بَكّير. لِبْسَت أواعي مُريحة، و طِلْعَت من بيتها. و راحَت على المَركَز و كان عِندها أوَّل دَرس عربي الساعة ١٠ الصُبِح. وصلت هُناك الساعه ٩:٥٥ قبل المَوعِد بِخَمِس دَقايق.

المُعَلِّم اسمو فَريد. كان لطيف و مِش سَريع.

سألها :

– أهلاً ليلى، كيفك اليوم؟

جاوَبَت :

– الحمد لله، منيحة.

بَلَّش الدرس. ليلى تْعَلَّمَت كَلِمات جديدة مثل: سوق، خُبِز، شاي، وقِت، شُغُل، إجْتِماع، مَشْروع، مُقابَلِه. بعد الدرس، حَكالها الأستاذ:

– لازم تحكي عربي كل يوم، حتى لو شوي.

المَسا، قَرَّرَت ليلى تْروح على السوق عَشان تِشْتَري أغراض. دَخْلَت لَمَحَل خُضره عشان تِشْتَري فواكِه و خُضره.

حَكالها البايع :

أهلاً و سَهلاً، كيف أساعدِك ؟

– لو سمحت، بدي نُص كيلو بَنْدوره و رُبِع كيلو خْيار، و حَبتين باتنجان، و ٥ حَبّات تُفاح، و كم حَبِّة موز
حكالها البايع:

– تفضّلي. كُلّو جاهِز.

كَم حْسابي ؟

حْسابِك كامِل (٤ دنانير و نُص)

حَسَّت ليلى إنها مَبْسوطه، لأنها قِدْرَت تِحكي عربي شوي لحالها . رِجْعَت لَبيتها، وكَتْبَت في دفترها:

اليوم حكيت عربي. و إنّ شاء الله بُكرا رح أحاوِل أحكي أكْتَر. المُهِم أنا” مبسوطة."

بعد أسبوع، صارَت ليلى أحسن بالعَرَبي. صارت تِفْهَم الناس أكْتَر، و تِحكي أكْتَر.
"هاي بس البداية."