أليكس شَب مِن فَرَنسا. دَرَس اللُّغَة العَرَبية بالجامعَة و بيحكي عَرَبي مْنيح كتير. أليكس مِهْتَم بالشُغُل مَع مُنَظَمات إنْسانية في بِلاد الشام.

بَعِد التَخَرُّج ، أليكس بَلَّش يْدَوِّر عَلى شُغُل في الأردن و فَلَسْطين. كَتَب: “Humanitarian jobs in Palestine / Jordan” و قَرَأ أكْتَر مِن إعْلان، و لَقى إعلان لَمُنَظَمِة في رام الله بِدّها مُوَظَّف دُوَلي يساعِد في المَشاريع الإجْتِماعية و يشْتَغِل مَع السُكّان المَحَلّيين. الإعْلان كان مَكْتوب بالإنجليزي والعَرَبي. أليكس قَرَّر يقَدِّم طَلَبُه و بَعَت سيرتُه الذاتية .

بَعِد مُدِّة، المُنَظَّمِة بَعتَتْلُه إيميل مَكْتوب فيه إنُّه “عِندُه مُقابلة شُغُل في زووم يوم الاربِعاء السّاعه ١١ الصُبِح بِتَوقيت فَلَسطين”

أليكس جَهَّز حالُه. حَضَّر نُسْخَة مِن شَهادْتُه الجامعية، شِهادات التَدّريب، و راجَع الكَلِمات العَرَبية المُهِمِّة لَلمُقابَلِة. يوم المُقابَلِة، قَعَّد على إللابتوب قَبِل الوَقِت بِــ ١٠ دَقايق، و شَيَّك عَلى الإنْتَرنِت والكاميرا و كُل شي جاهِز.

بَلَّشَت المُقابله، كان مَوجود مَعُه مُديرة المَوارِد البَشَريّة و مَسْؤول المَشاريع.

المُديرة: صَباح الخير أليكس! شُكراً عَلى وَقْتَك

أليكس: صَباح النور. شُكراً إلْكُم على الدَعوِة.

المَسْؤول: إحْكيلنا عَن خِبْرِتِك.

أليكس: أنا مِن فَرَنسا. دَرَسِت اللُّغَة العَرَبية في الجامعة، و عِنْدي خِبْرَة سَنِة و نُص مَع مُنَظَّمات إنْسانية إشْتغلِت معهٌم مِن قَبِل في فَرَنسا. و بَحِب أساعِد الناس وأتعامَل مَع مَشاريع مُجْتَمَعيّة.

المُديرة: مُمتاز. عِندَك خِبْرَة بالشُغُل مَع السُكّان المَحَلّيين أو الأطفال؟

أليكس: اه ، في فرنسا إشْتَغَلِت مَع الأطفال والمُراهِقين في بَرامِج تَعليمية إجْتِماعية.

المَسؤول: الشُغُل و الدَوام عِنّا ٥ أيام بالأُسبوع، مِن السّاعة ٩ الصُبِح للسّاعة ٥ المَسا. و لازِم تْكون في الإجْتِماعات، و تُكتُب تَقارير بَسيطة، و تِتْواصَل مَع السُكّان المَحَلّيين.

أليكس كَتَب كُل المُلاحَظات عَلى دَفْتَرُه و حَكى :

أليكس: فْهِمِت أنا جاهِز

المُديرة: إزا رَح نْوافِق عَليك، رَح نِبْعَتلك عَقِد لَمُدِّة ٦ شُهور ، و بَعْديها رَح تِحتاج لَتَصريح عَمَل في فَلَسطين.

بَعِد المُقابَلِة، أليكس سَكَّر اللابتوب و بَطَّل مِتْوَتِّر و إرْتاح كتير. و هو مَبْسوط كتير إنُّه قِدِر يحكي عَرَبي و يفْهَم كُل شي .

بَعِد أُسْبوع تَقْريباً، المُنَظَّمِة بَعتَتْلُه إيميل:

“مَبْروك! تَم قُبولَك ، إحنا وافَقنا عَليك. إبْعَتِلنا نُسْخَة مِن جَواز السَفَر، شَهادتَك الجامعية، وأي خِبْرات إضافية قَبِل أُسْبوع مِن مَوعِد الشُغُل. و رَح نِبْعَتلَك عَقِد العَمَل و تَصْريح العَمَل خِلال الاُسبوع الجاي.”

أليكس مَبْسوط كتير. و هيك صار عِنْدُه فُرصَة شَغُل حَقيقية في فَلَسطين، مَع مُنَظَّمِة إنْسانية، و بيقْدَر يسْتَخدِم العَرَبي يومياً و يتْعَلَّم عَن الحياة و الثَقافِة المَحَلّية و يساعِد الناس والعالَم.