فادي شَب ساكِن في عَمّان، يوم السَبت الصُبِح قَرَّر يروح عَسوق شَعبي قَريب من بيتُه

عَشان يِشْتَري جاكيت مُناسِب للشُغُل، لَمّا وِصِل شاف الشّارِع مَلْيان ناس و بَسْطات على كُل جهة

كان في أواعي كْنادر ، بوات، شَناتي وأغْراض لَلبيت، و كُل واحَد بَنادي على البْضاعة تَبْعِتُه بِصوت عالي.

وَقَّف عِند أوَّل بَسْطَة فيها جاكيتات.
مَسَك جاكيت أسْوَد و سَأل البايع: "قَدّيش هاد الجاكيت؟" البايع رَدّ : "بـ ١٥ دينار."
فادي شَيَّك عالجاكيت، و حسّ إنُّه تقيل و مُناسِب لِلشِتا، بَس السِعِر غالي عَليه.

فادي حَكالُه "بِصَراحة أنا ميزانيتي أقَل، بُزْبُط بـ ١٠ دنانير ؟"
البايع رَفَض و حَكى : "لا يَزَلَمِه قَليل خَلّيه ب ١٥."
فادي حَكى للبايع و قال: "طَيّب، رَح ألِفّ شوي و أرْجَع، إزا ما لَقيت إشي." و تَرَك الجاكيت و راح.

مَشى شوي و كَمَّل يتطَلَّع عالبَسطات التانية.
شاف جاكيتات تانية، بَس اغلَبْها كان خَفيف، والجوده مِش كويسه. و الوان غَريبه

فادي كان بِدّو إشي مُناسِب للشُغُل و رخيص و لونُه بَسيط، و سِعِر مُناسِب.

بَعِد ١٠ دقايق، وِصِل لبَسطة تانية.
شاف جاكيت كُحلي شِكْلُه مْرَتَّب وبسيط.
سَأَل البايع عَن سِعْرُه : "قدّيش هاد؟" البايع حكالُه: "١٠ دنانير."

فادي لِبْسُه، شاف المَقاس مْنيح، و حسّ إنّه مُناسِب.
حَكى للبايع: "بِصَراحة حابُّه للجاكيت، بَس مَعي ٨ دنانير بَس، بُزْبُط آخذُه بـ ٨ ؟"
البايع سَأَل: "عَنْجَد بَس ٨ مَعَك؟" فادي ضِحِك و حَكى : "آه، هاد كُل اللي معي اليوم."

البايع فكّر شوي و حَكى : "يلا ماشي، عَشان أوّل زبون مُحتَرَم اليوم."
فادي حَكالُه : "يعطيك العافية و شُكراً كتير." و دَفَع الـ ٨ دنانير وأخَذ الجاكيت و حَطُّه بكيس نايلون.

قبل ما يطْلَع من السوق، إشْترى كاسة شاي صغيرة من كُشُك عالزاوية.
و اخَد تكسي و راح عالبيت و هو مَبْسوط و مِرتاح بالجاكيت

__ المُهِم تِعْرَف كيف تْفاصِل __