أنا فَريد عُمْري ٢٩ سَنِة. ساكِن بعَمّان، و مِش عَم بَشْتَغِل هاي الفَتْرَة. كُل يوم الصُبِح، بَصْحى بَكّير، بَعْمِل قَهْوتي، و بَفْتَح اللابتوب و بَبَلِّش أدَوِّر على شُغُل كالعاده.

أنا عِنْدي خِبْرة تَقْريباً ٥ سْنين، بَس ما كُنت مَحْظوظ بالفَتْرَة الأخيرَة. قَدَّمِت على أكَمِّن وظيفة، و بَعَتِت سيرتي الذاتية (cv) لأكتر مِن شِركة و مُنَظَّمات كتير، بَس ما كان في رَدّ لِلأسَف، و حَتّى الواسطه عالفاضي.

في يوم مِن الأيام، و أنا عَم بشَيّك الإيميل، شُفِت رِسالِة جْديدة. فَتَحْتها عالسَّريع، و كتير كُنت مِتْوَتِّر. كانَت دَعوِة لَمُقابَلِة شُغُل بِشِركِة صغيرة.

قرأت الإيميل مَرْتَين، و بَعدين حَكيت:

الحَمْدُ لِلّه… أخيرًا!

تاني يوم، بلَّشِت أجَهِّز حالي. حَضَّرِت أواعي مْرَتَّبِة، و راجَعِت الأسئلة، و فَكَّرِت شو بِدّي أحكي عَن حالي. كُنت مِتْوَتِّر و قَلْقان شوي، بس مِتْحَمِّس.

يوم المُقابلة، طْلِعِت من البيت قَبِل المَوعِد بِنُص ساعة. أخَدِت تكسي و وْصِلِت عالشِركِة. إسْتَنّيت شوي، و كُنت جاهِز.

بَعِد شوي، نادوا عَلى إسْمي. دَخَلِت على الغُرفة، و سَلَّمِت عليهُم.

المُدير حَكى:

أهلًا فَريد، تْفَضَّل اُقْعُد.

إبْتَسَمِت و حكيتلُه :

شُكرًا.

سَأَلوني عَن خِبْرِتي، عَن شُغلي القَديم، و ليش تَرَكِت. رَدّيت بِ رَواق، و حكيتلُه السَبَب.

بِالآخر، حَكى المُدير:

– رَح نِتْواصَل مَعَك قَريباً.

طْلِعِت مِن الشِركِة، و مِش عارِف شو رَح يصير بعدين. بس حَسّيت إنّي عمِلِت اللّي عَلي.

حَكيت لَحالي :

المُهِم حاوِلِت.

رْجِعِت عالبيت، و سَأَلوني أهلي كيف كانَت المُقابَلِه ؟

حَكيتِلْهُم :

"كانت تمام. كنت مِتْوَتِّر شوي، بس جاوبت منيح، و إنّ شاء الله كُلّو تمام."

و اليوم اللّي بَعدُه، صْحيت و شَيَّكِت إيميلي…

و كان في رِسالِة جديدة. الحَمدُلِلّه وافَقوا إنُّه أشْتَغِل مَعهُم.

أخيراً لَقيت شُغُل.