مارك شَب مِن كَنَدا. ساكِن في عَمّان مِن شَهرين، و عَم يتْعَلَّم عَرَبي شوي شوي. مارك بِحِب اللُّغة العَرَبية لإنُّه بِشْتَغِل مَع ناس مِن الأُردُن و فَلَسطين و لِبْنان و سوريا و بِدُّه يفْهَمْهُم أحْسَن.

يوم الأحد الصُبِح، مارك قَرَّر يروح عَلى مَركَز لُغة عَرَبيه قَريب مِن البيت عَشان يسَجِّل في دَورة تَعْليم عَرَبي. قَبِل ما يِطْلَع، مارك بِيحَضِّر دَفْتَر صغير و قَلَم عَشان يُكْتُب مَعْلومات، و بياخُد مَعُه مَصاري عَشان يدْفَع للدَورة

مارك بيمشي بالطَريق و بيوصَل عَلى المَركَز بَعِد ١٠ دَقايق. باب المَركَز كْبير و في لَوحَة مَكْتوب عَليها: “مَركز زَيتونه لِتَعليم اللُّغه العَرَبيه الحَديثه”. بيُدْخُل مارك و بيشوف مُوَظَّفِة الإسْتِقْبال.

مارك : صَباح الخير

المُوَظَّفِة : صَباح النور، أهلاً وسهلاً. كيف بَقْدَر أساعدَك؟

مارك : بِدّي أسَجّل في دَورة لُغة عَرَبية.

المُوَظَّفِة: أكيد! شو مُسْتواك بالعَرَبي؟ مُبْتَدِئ وِلاّ مُتَوَسِّط؟

مارك: أنا ما دَرَسِت عَرَبي مِن قَبِل بَس أنا مُستواي مُبْتَدِئ، بَس بَفْهَم شوية.

المُوَظَّفِة: مُمْتاز. في عِنّا دَورة للمُبْتَدئين كُل يوم إثنين وأربعاء مِن السّاعة ١٠ لَلسّاعة ١ الضُهُر.

مارك: كَم مُدِّة الدَورة؟

المُوَظَّفِة: شَهَر كامِل. و في نِهاية الدَورة بِتاخُد شَهادِة.

مارك بيسجِّل المَعلومات: الإسِم، البَريد الإلكتروني، و رَقَم التَليفون. بَعدين المُوَظَّفِة بِتِسْأَل:

المُوَظَّفِة: بِدَّك تِدْفَع اليوم وِلاّ أول يوم بالدَورة؟

مارك: بِدْفَع اليوم لَو سَمَحتي.

مارك بيدْفَع و بياخُد فاتوره و وَرَقة مَكْتوب فيها مَواعيد الدْروس والجَدوَل. بيطْلَع مِن المَركَز و هو مَبْسوط لإنُّه عِمِل خُطوة مُهمِّة ، و مِتحَمِّس كتير عَشان يبَلِّش يتْعَلَّم عَرَبي

و بِجَهِّز حالُه عَشان يبَلِّش الاُسبوع الجاي.