إيما بِنِت مِن إسْبانيا. هي ساكْنِة في عَمّان و عَم تِتْعَلَّم عَرَبي مِن ٦ شُهور. إيما بِتِحْكي عَرَبي شوي، و بِتْحِب تِدَرَّب كُل يوم عَلى الكَلِمات الجْديدِه. الأُسْبوع الماضي، إيما شافَت إعلان عَلى الإنْتَرنِت عَن شُغُل “مُساعَدِة مَكْتَب”. حَبَّت الفِكْرة و قَدَّمَت طَلَب.

بَعِد يومين، المَعْهَد بَعَت لإيما رِسالِة و حَكولْها : “عِنْدِك مُقابَلِة يوم الأربِعاء السّاعَة ١٠ الصُبِح”. إيما إنْبَسطَت و قَرَّرَت تْجَهِّز حالها .

يوم الأربعاء، إيما صِحْيَّت بَكّير. شِرْبَت قَهْوِتْها و لِبْسَت رَسْمي و بَسيط. بعدين شَيَّكَت عَلَى العِنْوان و راحَت عَلى المَكْتَب بالتكسي. الطَريق مِش طَويل، و بَعِد ٢٠ دَقيقَة وِصْلَت.

دَخْلَت عَلى المَكْتَب و شافَت مُوَظَّفِة إسْتِقْبال .

المُوَظَّفِة: صَباح الخير! كيف بَقْدَر أساعدِك؟

إيما: صَباح النور. عِنْدي مُقابَلِة شُغُل السّاعة ١٠ .

المُوَظَّفِة: تْفَضَّلي، أُقْعُدي هون لَو سَمَحْتي. المَسْؤول جاي بَعِد شوي.

بَعِد ٥ دَقايق، المَسْؤول بيجي و بِطْلُب مِن إيما تِدْخُل عَلى الغُرفِة الصغيرة.

المَسْؤول: أهلاً وسهلاً، تْفَضَّلي.

إيما: شُكْرَاً.

المَسْؤول: خَبْرينا شوي عَن حالِك.

إيما: أنا مِن إسْبانيا، عَم بَدْرُس عَرَبي، و بَحكي عَرَبي شوي. بَشْتَغِل مْنيح عَلى الكومبيوتَر و بَحِب أشْتَغِل مَع النّاس.

المَسْؤول: مُمْتاز. عِنْدِك خِبْرَة بالمَكاتِب؟

إيما: عِنْدي خِبْرَة صغيرة مِن مَدْرَسِة اللُّغَة بإسْبانيا.

المَسْؤول: مُمْتاز. الشُغُل ٥ أيّام بالأُسْبوع، مِن السّاعة ٩ لِلسّاعة ٣ المَسا

إيما سألتُه:

إيما: في تَدْريب قِبِل الشُغُل؟

المَسْؤول: أكيد، في تَدْريب لَمُدِّة أُسْبوع.

إيما: مُمْتاز.

بآخِر المُقابَلِة حَكوا في كُل شي، المَسْؤول حَكى لإيما:

المَسْؤول: إن شاء اللَّه رَح نِتْواصَل مَعِك خِلال يومين.

إيما: شُكرَاً كتير. مَع السَّلامِه

إيما طِلْعَت مِن المَكْتَب . حَسَّت إنْها حَكَت عَرَبي مْنيح بالمُقابَلِة. و هي راجعة عَلى البيت كَتْبَت كَلِمات جْديدِة عَلى دَفْتَرها زَيّ : “خِبْرَة، تَدْريب، مَسْؤول، مَكْتَب، رَسْمي، وَظيفِة، رَدّ”.

بالليل، إيما بِتْراجِع الكَلِمات و بِتِحْكي لَحالها: “كُل يوم بَتْعَلَّم شوي، و بُكْرا أحْسَن!”