عَلي شَب عَرَبي مِن عَمّان، عُمْرُه ٢٥ سَنِة، أوَّل مَرَّة بِحَياتُه بِسافِر بَرّا الشَرق الأوسَط. بَعِد ما خَلَّص جامعَة و إشْتَغَل سَنْتين، قَرَّر يروح عَلى ألمانيا يحْضَر تَدْريب قَصير بالشُغُل مُدِّتُه أُسْبوعين. و حَبّ يجَرِّب و يشوف الدِنيا برّا شوي.

يوم السَّفَر، وِصِل عَلي عالمَطار قَبِل ٣ ساعات، لابِس عادي: جينز، جاكيت، و شَنْتِه. حَسّ حالُه مِتْوَتِّر بَس مِش خايف. بَس كتير مِتْحَمِّس عَشان التَجْرُبِه الجديدِه و مِش مِتْوَقِّع إشي .

أوَّل ما دَخَل على الطَيّارة، لاحَظ إنُّه أغْلَب النّاس قاعدين عَم يِحْكوا لُغات مُخْتَلِفِة، حَسّ حالُه غَريب شوي بَس لِسّا مِتْحَمِّس

طول الرِحْلِة كان يِتْفَرَّج مِن الشُبّاك، يِسْمَع موسيقى، و يحاوِل يِحكي كَم كِلْمِة بالإنجليزي مَع النّاس إلّي حَواليه

نِزِل عَلي في مَطار كبير بألمانيا، كُل إشي مُنَظَّم لَوحات واضحة، و النّاس ماشية بِسُرعة و مِستَعجِلين. أوَّل إشي خَطَر في بالُه : "يا زَلَمِة كُل إشي مْرَتَّب زيادِة عَن اللُّزوم".

إسْتَغْرَب إنُّه ما حَدا بيفَتِّش الشَنْتِه تَفْتيش مُبالغ فيه، و هو مِش مِتْعَوِّد عَلى هاد النِظام، لاحَظ إنُه النّاس مِلْتِزمه

الشركة حَجْزَتْلُه غُرفِة صغيرة بِفُنْدُق قَريب مِن مَكان التَدْريب، الغُرفِة بَسيطة و نْظيفِة، بَس حَسّها باردِة شوي. فَتَح الشُبّاك و شاف الشّارِع هادي، ما في زَمامير و دَوشِه وَلا حَدا بِصَرِّخ.

أوَّل يوم طِلِع يتْمَشَّى لَحالُه، إسْتَخْدَم الخَريطَه عَلى التَلِفون عَشان يرْكَب المِتْرو، و إنْصَدَم مِن الدِّقَة بالمَواعيد.

لَمّا ضاع بالمَحَطَّة، سَأَل واحَد كْبير بالعُمُر بالإنجليزي، الزَلَمِة وَقَّف مَعُه دَقيقَة و ساعَدُه وَرجاه عَلى الخَريطَة بِدون ما ينْزَعِج.

أكتر إشي حَسُّه مُخْتَلِف هو الأكِل. الفْطور عِنْدهُم خَفيف، خُبِز، جِبْنِة، قَهْوِة، مَع إنُّه هو مِتْعَوِّد عَلى فْطور دِسِم و أثْقَل.

جَرَّب أكِلْهُم بَس بَعِد يومين صار يشْتاق لَلْمَنْسَف و الفَلافِل، فَبَلَّش يدَوِّر عَلى مَطاعِم عَرَبية، و لَمّا لَقى مَطعَم سوري قَريب حَسّ حالُه مِرتاح.

لاحَظّ إنُّه النّاس ما بِحكوا كتير، كُل واحَد مَشْغول بِحالُه، حَتَّى بالكافيه كُل واحَد ماسِك لابْتوب أو كْتاب. ما حَسّ إنّهُم باردين مِثِل ما النّاس بِتِحْكي، بَس صَح إنّهُم رَسْميين شوي و مُباشِرين بالحَكي. ما في مُجامَلات زايدِة، بَس بِنَفْس الوَقِت ما حَدا بِتْدَّخَل بِحَياتَك.

بالمَكْتَب كانوا زُُمَلائُه مُحْتَرَمين، بِساعدوه إذا سَأَل، بَس ما في حَكي طَويل عَن العيلِة والطَلْعات إلّا بَعِد كَم يوم لَمّا صاروا يِتْعَوَّدوا عَليه. حَسّ إنُّه في إحْتِرام عالي لَلوَقِت، إذا حَكولُه إجْتِماع السّاعة ٩، يكونوا كُلْهَم مَوجودين قَبِلها بِدقايق.

لَمّا رِجِع عَلى عَمّان، أوَّل إشي إشْتاقلُه هو ريحِة البَلَد، أصْوات السَيّارات، النّاس بِتِحْكي بِصوت أعْلَى، و حَسّ بِشُعور إنُّه “ مَكاني". بِنَفْس الوَقِت، صار يِشوف بَعض الأشياء اللّي مِتْعَوِّد عَليها بَس بِطَريقَه مُخْتَلِفِة.

صار يِقْدِّر نِظام المُواصَلات و المَواعيد

تْعَلَّم إنُّه أوروبا مِش جَنِّة وَلا فيلم، هي مَكان فيه إيجابيات و سَلْبيات، بَس التَجْرُبِة نَفْسها بِتِفْتَح مُخ الواحَد و بِتْعَلّمُه يشوف حالُه و يساعِد في تطوير بلدُه وبطريقه افضل لَلكُل