مارك شَب مِن كَنَدا، ساكِن بِعَمّان مِن حَوالي ٣ شهور. هو عَم يتعلّم عَرَبي شوي شوي و عَم يحاوِل يفْهَم الثَقافِة اكْتَر و اكْتَر
يوم مِن الأيام رَنّ عَليه صاحبُه احمَد و حَكالُه:

“ مارك كيفك ؟، يوم الجُمعة عِنّا عُرس قَرايبي. تَعال إزا بِدَّك! فُرْصَة عَشان تْشوف كيف الأعراس عِنّا.”

مارك حَكى:

“أكيد! مافي مُشْكِلِه. أنا حابِب اكون مَعْكُم.”

يوم العُرُس، احمَد أجى أخَد مارك بالسَيّارة. بالطَريق شَرَحلُه شوي عَن العادات و حَكالُه: إنُّه العُرُس رَح يكون كبير ، و رَح يكون مليان ناس كتير. من عيلة العريس و عيلة العروس، و في رَقِص، و في زَغاريط، و رَح يكون في عَشا كمان. و لِلعِلِم العُرُس مِش مُخَْلَط

لَمّا وِصلوا على الصالة، مارك لاحَظ أوَّل شي إنُّه في ناس كتير زي ما حكى أحمَد، و اغلَب الشَباب لابسين بدلات رَسمي و نُصهُم عادي، والنسوان لابسات فَساتين و مْجَهزين حالْهُم و الكُل مْرَتَّب.

قَبِل ما يفوتوا، في ضيافة صغيرة عند الباب : قهوة عربية و تَمِر، و في ناس عَم يسَلّموا على المَعازيم. و يِسْتَقْبِلوهُم.

أحمَد حَكى لمارك:

هَدول قَرايب العَريس عَم يسْتَقْبِلوا الناس.

مارك سَلَّم عَليهُم و عَرَّف عَن حالُه. جَرِّب القَهْوِة العَرَبية لأوَّل مَرّة، و عَجْبَتُه كتير، والطَعِم كان جديد عليه

بَعِد شوي بَلَّشوا الدّبكة

مجموعة شباب وقَّفوا صَف واحَد و بَلَّشوا يدْبِكوا سَوا بِنَفس الوَقِت .

مارك كان واقِف عَم يتْفَرَّج و مَبْسوط مِن الطاقة و مِتفاجِئ.

أحمد سألُه:

بِدَّك تْجَرِّب؟

مارك ضِحِك و قال:

مِش هَسّه ، خَلّيني أتْعَلَّم شوي بالأوَّل، لإنُّه مْبَيّن كتير مُعَقَّد هههه.

الزَغاريط كانَت جُزُء تاني و مُفاجِئ، لَفَت إنْتِباهُه. فَجْأَة كَم سِت صاروا يعملوا أصوات عالية و يردّوا عَلى بَعَض.

مارك إنْصَدَم شوي و إسْتَغرَب و قال:

شو هالصوت ؟ و شو عَم يحكوا، مِش فاهِم ؟!

احمد ضِحِك و قال:

هاي زغروطة! لَلتَعبير عَن الفَرَح.

قَبِل العَشاء، كان في زفِّة. العَريس فات مَع أهلُه و مَع أغاني تُراثية و موسيقى قَويّة.

مارك لاحظ إنه كل الناس وَقَّفوا حَواليه و بَلّشوا يرقُصوا و يزَقّفوا و مِنْسِجمين مَع الدَّبْكِه.

أجى وَقت العشا، و الاكل كان كتير و كُل شي مْرَتَّب واكيد العشا مناسِف واحمد شَرَح لمارك إيش هو المَنْسَف و ليش مُهِم في بَلَدنا و ثَقافِتنا و عاداتنا
:“المَنْسَف أكْلِة تَقليدية، و رَمز للكَرَم و تُراث مِن أيّام زَمان، و مْنِعْمِلُه بالأعراس و مُناسبات تانيه لأنه مَعناها كَرَم و ضيافِه بعاداتنا و تقاليدنا و اكيد ثقافتنا

و أهَم إشي طَريقِة أكِل المَنْسَف، و تْفاجَئ لَمّا عِرِف إنُّه بناكلُه بالإيد المُهُم

مارك حاول ياكل حَسَب العادات و التقاليد الصحيحة. رُغُم إنُّه كان خايف يخَبِّص و يِنْعَجِق .

في زَلَمِه خِتيار حكالُه : لا تِتْوَتَّر، معلِش هاي اوَّل مَرَّة فا كُل براحتَك.

بعد الأكل رجعت الدبكة

هالمَرّة أحمد سَحَب مارك على الدَبْكِة و حَكالُه:

“تعال، بَسيطة، شوف شو مْنِعمَل و إمْشي مَعنا خُطوِه خُطوِه.”

مارك حاول على قَدّ ما يَقْدَر. والناس تْشَجْعُه و كان الجو لَطيف و كُلُّه طاقه

و بعد الدَّبكِه. إجى العريس و سَلَّم عَلى كُل الناس و اصحابُه و اهلُه و هاي كانت عشان النقوط و يُشْكُر الناس.

و مارك إسْتَغرَب و سأل أحمد. إنُّه ليش الكُل عم بعطوه مَصاري في إيدُه بس يسَلِّم عليهُم ؟ عَشان هاي إسِمها النْقوط في عاداتنا و تَقاليدنا.

بِنِهاية العُرُس

مارك حَكى لأحمَد :

“هاي كانَت أوَّل مَرَّة بَحْضَر عُرُس عَرَبي في حَياتي. حَسّيت النّاس مَبْسوطين و فَرْحانين و الجَو كان حِلو و إيجابي و زَي كإنُّه عيلة وَحدِه و إحتِرام واحَد، و ضيافه مو بَس حَفلِه و خَلَص.

و احمد حَكالُه:

“العُرس هون مِش بَس لِلعَريس والعَروس، العُرس لِلعيلِة كلها.”

المُهِم إنَّك تْعَرَّفِت على عاداتنا و ثَقافِتْنا

مارك رِجِع عالبيت و حاسِس حالُه فِهِم جُزُء جديد مِن الثَقافِة:

الفَرحه، العيلِة، الكَرَم و الضيافه، الموسيقى، الدَبْكِة، والزغاريد.

و خُصوصاِ طَريقِة أكِل المَنْسَف