أنا إسمي ماريا، أجْنَبيه مِن اوروبا مِن هولَندا بالتَحديد. قَرَّرِت آجي على عَمّان كَسياحه. وصِلِت المطار / الحُدود و رُحِت على قِسِم الجَوازات عَشان آخد خِتِم والتأشيره. سَأَلوني أكَمِّن سُؤال بَسيط لِلمَعْلومات زَي مثلاً (ليش بِدِّك تْزوري عَمّان ؟ وين رَح تُسكُني ؟ و قدّيش رَح تْضَلّي ؟) و طَبعاً جاوَبِت بِصراحه. بَعِد شوي أعطوني التَأشيره/ الفيزا لَمُدِّة أُسبوعين و خَتَموها على جَواز سَفري.

أنا إسْتأجَرِت شَقّه صغيره في جَبَل الحُسين، حَطّيت كُل اغراضي و طْلِعِت أكْتَشِف المَدينه. بَعِد ١٠ أيّام إنْتَبَهِت إنُّه تأشيرتي رح تِنتَهي. و أنا حابّه أضَل اكتر كمان فا فَكَّرِت (كيف بَقْدَر أجَدِّد التأشيره/ الفيزا ازا بدي اضَل أكتر؟).

فا رُحِت على الإقامه والحُدود إلّي موجوده في تلاع العلي عَشان أعمِل الإجراءات لتجديد الفيزا/ التأشيره. والناس هُناك ساعدوني و عَبّيت معلوماتي و عمِلت الخُطوات هاي :

أوَّل إشي : لازم يكون معك جواز السَفَر و هويتك و كمان هوية صاحب البيت و عقد البيت.

تاني إشي : بِتعَبّي معلوماتك و بتستنّى عالدور

تالت إشي : بتطلب/ــي تَمديد الفيزا و بتدفع مصاري ازا مِتأخِّر/ة

رابع إشي : المُوَظَّف بختم جوازك وبتاخد/ـي الجواز و بتروح/ــي

ما تأخَّرِت كتير هُناك، خِلال نُص ساعه او ساعه بالكتير كانت فيزتي جاهزه وإسْتَلَمتها بِنَفس اليوم. طْلِعِت عالشّارِع و اخَدِت تَكسي و رُحِت على جبل اللويبده عشان أشْرَب قهوه.

كَمَّلِت يومي و انا مبسوطه و مرتاحه عشان جَدَّدِت فيزتي / تأشيرتي بدون اي مشاكل والاجراءات كانت سهلة. و قَضّيت وَقِت حِلو كتير في هاد البلد