روتيني اليومي

أنا إسمي عادِل ساكِن بِعمّان بالدوّار الخامِس. كُل يوم تَقريبًا بَصحى حَوالي السّاعة ٧ الصُبِح. أوّل شي بَعِمِلُه بَروح على المَطْبَخ، بَعْمِل قهوة و باكُل إشي خَفيف. بَعدين بَلْبِس و بَنْزِل مِن البيت حَوالي السّاعة ٨ إلّا شوي.

بَنْزِل عالشّارِع و بَسْتَنّى الباص. مَرّات الباص بيجي بسُرعة، مَرّات بَتْأَخَّر شوي. و عادةً في أزْمِه. الطَريق لَلمَكْتَب بياخُد تَقريبًا نُص ساعة. أنا بَشْتَغِل بِمَكْتَب صغير جَنب الدُوّار التالت. الشُغُل عِندي هادي مافي دَوشِه. بَفْتَح اللابتوب، بَشَيّك الإيميلات و بَبَلِّش شُغلي.

حَوالي السّاعة ١ الظهر مِنِطْلَع أنا و زُملائي على مَطعَم قَريب عَشان نِتغَدّى. مَرّات بناكُل مَقلوبة، مَرّات شاورما، مَرّات بَس فَلافِل حَسَب. بَعِد الأكل بنِرجَع على المَكتَب و بِنْكَمِّل شُغُل لَحَد السّاعة ٥.

بَعِد الشُغُل بَرجَع عالبيت. إزا ما كُنت تَعبان بَروح على الدّار جَنْبنا دُكّانة صغيرة ، بَشتَري شَغلات بَسيطة مِثِل خُبِز و لَبَن. مَرّات كَمان بَروح على النادي عَشان الْعَب رياضه شوي.

بالليل بَقْعُد مَع أهلي شوي. مْنِحكي و مِنتعشّى. بَعدين بَحْضَر حَلَقة مِن مُسلْسل عَرَبي او اجْنَبي أو فيديوهات عَلى اليوتيوب. حَوالي السّاعة ١١ بالليل بَروح على غُرفتي و بَجَهِّز حالي لَلنوم.

وبس! هاد يومي العادي بِعمّان. مِش دايمًا نَفس الشي، بَس أغْلَب الأيام هيك.