انا حَسَن و بِهاد اليوم كُنت مَعْزوم عِنْد بيت صاحبي علي على الغَدا و لِلأسَف كُنت مِتأخِّر شوي، فا طْلِعِت من بيتي و نْزِلِت عالشّارِع عَشان آخُد تَكْسي، و لَقيت تَكْسي جاي مِن بْعيد و إنْتَبَهِت إنُّه فاضي، أشَّرِت و بَعْدين وَقَّف عاليمين قَريب مِن الرَصيف.

حَسَن : يعطيك إلعافيه، طالِع معلَّم ؟

السايق : الله يعافيك، آه بس وين طَريقَك ؟

حَسَن : بِدِّي أروح على الدّوّار السابِع عِند شارِع نوح الرومي

السايق : تمام بِس بَعْرَفِش وين هاد الشارِع. بَس نوصَل هُناك بِتْدِّلني تمام.

حَسَن : اكيد مافي مُشكله ابداً، رَح اَدَلَّك عالمَوقِع

حَكينا شوي مع بَعَض وكان الطَريق أزْمِه كتير

حَسَن : الازْمِه بِكُل مَكان و انا مِسْتَعجِل كتير و بِدّيش أتأخَّر.

السايق : وَلا يهمَّك هَسّا الازْمِه بِِتْروح والطَريق بِصير احْسَن و أسْرَع

المُهِم وْصِلنا على الدّوار السابِع، و هَسّا لازِم أدِلُّه على بيت علي

السايق : مِن وين اروح هَسّا؟ عَشان في تَقاطُع

حَسَن : روح يَمين و بَعدين إدْخُل شْمال

السايق : تمام، في دُوّار ! وين اروح هَسّا؟

حَسَن : من الدُوّار لِف شْمال وإدْخُل أوَّل يَمين و بَعدين خَلّيك دُغري لآخِر الشّارِع

بَعِد كُل هاد وصِلنا أخيراً

حَسَن : يَعطيك العافيه عَمّو. نَزِّلني هون لَو سَمَحت

السايق : الله يعافيك. تْفَضَّل

حَسَن : قَدّيش حْسابي / قَدّيش العَدّاد ؟

السايق : ٤ دَنانير و نُص.

اعطيتُه ١٠ و حَكالي ..

السايق : ما مَعَك فَكِّه أبداً ؟

حَسَن : للأسَف لأ ما مَعي غيرها

السايق : بَسيطه

و رَجَّعلي الباقي و نْزِلِت مِن التَكسي و سَكَّرِت الباب و رُحِت لبيت عَلي

مِشوار ما كان سَريع عَشان الازْمِه و كُنت مِتْأخِّر بَس مَعلِش المُهم وْصِلِت