هَديك المَرَّه ،. كُنت أرَتِّب أغْراضي و لَقيت صُوَّر قديمه إلي من أيام الطُفوله. مِن بين كُل الصُوَّر كان في صورة جماعيه لَطُلّاب صَفّي بالمدرسه، بِصَراحه الصّوره رَجَّعَتني لأيّام زَمان، و زَكَّرَتني بصحابي . إزا ما كُنت غلطان ، هاي الصوره كانت بالصف الرابع .

انا بالصوره فوق تاني واحَد عالشمال، و جَنبي من اليمين كَريم أعَز أصْحابي من ايّام المدرسه، كُنّا دايماً نِمْشي مَع بَعَض و نُقْعُد مَع بَعَض و نِعْمِل كُل شي مَع بَعَض و كمان كُنّا نِشْبه بَعَض كتير و احياناً كانوا يفكرونا إخوان . بس هو كان اطْوَل مِنّي شوي .. مُمْكِن مِش شوي

كَريم صَعِب اوصِفُه لإنُّه كان شَخص مَوهوب و إجْتِماعي و شخصيتُه حلوه و كتير محبوب بالمدرسه و كان أحْسَن طالِب بالصَف و بَتْزَكَّر مَرَّه كان في طالِب لئيم أخَد الدَفتر ، بس كريم كان مِتْسامِح و ما عِمِل مُشْكِله . آخِر مَرَّه شُفِت فيها كَريم كانت قبل ٣ سنين ، شُفتُه بالصُدْفِه بِمَطْعَم و أصَرّ يَعْزِمني ، كَريم طول عُمرُه كَريم و ما عُمْرُه كان مَصْلَحجي أو أناني ، و أنا كُنت دايماً أحْكيلُه إنت إسِم على مُسَمّى

بِهَداك اليوم كُنت مَبْسوط كتير عَشان شُفْتُه و حكينا عن زِكْرَياتنا أيّام المدرسه ، و عن أُستاز رأفَت إلّي كُنّا نْحِبُّه و نِحْتِرمُه كتير لإنُّه كان دايماً يساعدنا و ما كان عَصَبي ابداً ! و كمان أُستازه جميله إلّي كانَت تْدَرِّسنا موسيقى و كانت هاديه و لطيفه و أُسلوبها حلو ، و أحلى شي إنّها كانت بتِضَحّثك كتير .

بَتْمَنّى أرْجَع أشوف كَريم كَمان مَرَّه بس هو هَلّأ مْسافِر على بريطانيا عشان يكَمِّل ماجستير ، و أنا كمان حابِب أكَمِّل دراستي و أسافِر، و مُمْكِِن أروح على أوروبا و أزور كَريم في لُنْدُن، لإنّي مِشْتاقلُه كتير و بَتْمَنّى تِرْجَع صُحبِتنا مِتِل زَمان ، لإنُّه كَريم شَخص رائع و مِش عادي و صاحِب ما بَنْساه ..