رحلة سارة وليلى من العقبة إلى ذهب سارة وليلى هم صاحبات من عمان وبعرفوا بعض من زمان قرروا يسافروا على البحر لعطلة قصيرة بس المرة هاي ما رح يسافروا عن طريق الطيارة رح يسافروا عن طريق العبارة من العقبة. ليلى وسارة جهزوا حالهم وحضروا أغراضهم وكل إشي بدهم إياه. قبل موعد السفر بيومين سارة رنت على شركة جت في العبدلي وسألتهم عن مواعيد الرحلات للعقبة وحكولها مواعيد الرحلات للعقبة في اول موعد الساعة سبعة الصبح وفي الساعة عشرة الصبح وفي الساعة واحد الظهر وفي الساعة خمسة المساء والساعة سبعة المغرب. سارة حجزت موعد لشخصين في باص جت من العبدلي الساعة عشرة الصبح. بعد يومين سارة وليلى صحيوا الصبح وراحوا على أخذوا تاكسي وراحوا مع بعض على مكتب جت في العبدلي. دخلوا على المكتب وطلبوا من الموظفة تذكرتين و دفعوا سعر التذكرة عشرة دنانير للشخص بعدين ركبوا في الباص والطريق من عمان للعقبة مدته من ٤ - ٥ ساعات تقريبا، حسب الطريق.المهم خلال الطريق أفطروا سوا وأكلوا شغلات خفيفة معجنات، عصير، بسكوت وحضروا فيلم قصير وسمعوا شوية أغاني لفيروز طبعا المهم بعد ٥ ساعات وصلواالعقبة في وسط البلد وأخذوا تاكسي وراحوا لميناء العقبة مشوار التاكسي من وسط البلد لميناء العقبة تقريبا عشر دقايق يعني دينارين أو ثلاث دنانير في التاكسي, وصلوا عند ميناء العقبة ودخلوا من الباب وشيّكوا على أغراضهم وراحوا دفعوا غرامة ١٠ دنانير واستنوا شوي في الجوازات والحمد لله ما كان في مشاكِل و ما كانت مليانة ناس. فا إحنا محظوظين يعني. المُهِم العَبّاره موعدها السّاعه ١٠ بالليل و بعد تقريبا ساعة ونص وإحنا بنستنى إجت العبّارة ورحنا عليها و خَتَمنا جوازاتنا و حطينا اغراضنا و طْلِعنا على السَطِح و كان الجو كتير هادي و رايق.

المُهِم تْحَرَكَت العَبّاره من الميناء ومُدِّة الطريق تقريباً من ٣ لَــ ٤ ساعات و خلال هاد الوقت تْعَرّفنا على ناس لطيفين و عَزمونا على شاي. نِمنا شوي تقريباً ساعه و بعدين وْصِلنا الحمدلله على ميناء نويبع.رُحنا على الجوازات و خَتَمنا كمان مَرَّه و ما دفعنا ولا شي وخلال هاد الوقت كان الشوفير “زين” بستنّى فينا برا. إستقبلنا زين و حطينا اغراضنا بالسيّاره و تْحرَكنا. و مُدِّة الطريق كانت ساعه تقريباً وبصراحه حبينا الطريق من نويبع لَدَهَب.

و لَمّا شَمّينا ريحة البَحَر عرِفنا إنُّه إحنا وْصِلنا دَهَب و بالنِسبه لإلي هو مكاني المُفَضَّل.