عَلي شَب عربي من عمّان، عمره ٢٥ سنة، أول مرّة بحياته بِسافِر برا الشرق الأوسط. بعد ما خلّص جامعة و إشتغل سَنتين، قَرَّر يروح على ألمانيا يحضر تدريب قَصير بالشغل مُدِّتُه أُسبوعين. ما كان حاب يعمل منها قصة دراما، بس حبّ يجرب يشوف الدنيا برّا شوي.

يوم السفر، وِصل علي على مطار قبل ٣ ساعات، لابس عادي: جينز، جاكيت، و شَنتِه. حَسّ حالُه مِتْوَتِّر بس مش خايف. بس كتير مِتْحَمِّس عشان التَجْرُبِه الجديده و مِش مِتْوَقِّع إشي .

أول ما دخل على الطيارة، لاحظ إنه أغلب الناس أجانب و قاعدين عم يحكوا لغات مختلفة، حس حاله غريب شوي بس لِسّا مِتْحَمِّس

طول الرحلة كان يتفرج من الشباك، يسمع موسيقى، و يحاوِل يحكي كم كلمة بالانجليزي مع الناس إلّي حَواليه

نِزِل علي في مطار كبير بألمانيا، كل إشي مُنَظَّم لوحات واضحة، والناس ماشية بسرعة. أول إشي خَطَر في بالُه : "يا زلمة كل إشي مْرَتَّب زيادة عن اللزوم".

إسْتَغْرَب إنُّه ما حدا بيفتش الشَنته تفتيش مُبالغ فيه، وهو مِش متعود على هاد النِظام، لاحظ إنُه الناس مِلْتِزمه

الشركة حجزتله غرفة صغيرة بفندق قريب من مكان التدريب، الغرفة بسيطة ونظيفة، بس حسها باردة شوي. فتح الشباك وشاف الشارع هادي، ما في زمامير ولا حدا بِصَرِّخ.

أول يوم طلع يتمشى لحاله، استخدم الخريطه على التلفون عشان يركب المترو، وانصدم من الدقة بالمواعيد.

لما ضاع بمحطة، سأل واحد كبير بالعمر بالإنجليزي، الزلمة وقف معه دقيقة و ورجاه على الخريطة بدون ما يتدايق.

أكتر إشي حَسُّه مختلف هو الأكل. الفطور عندهم خفيف، خبز، جبنة، قهوة، بينما هو متعود على فطور أثقل.

جرّب أكلهم بس بعد يومين صار يشتاق للمنسف والفلافل، فبلّش يدور على مطاعم عربية، ولما لقى مطعم سوري قريب حس حاله مرتاح.

لاحظ إنه الناس ما بِحكوا كتير، كل واحد مشغول بحاله، حتى بالكافيه كل واحد ماسك لابتوب أو كتاب. ما حس إنهم باردين مثل ما الناس بتحكي، بس صح إنهم رسميين شوي ومباشرين بالحكي. ما في مجاملات زايدة، بس بنفس الوقت ما حدا بتدخل بحياتك.

بالمكتب كانوا زُُملائُه محترمين، بيساعدوه إذا سأل، بس ما في حكي طويل عن العيلة والطلعات إلا بعد كم يوم لما صاروا يتعودوا عليه. حَسّ إنه في احترام عالي للوقت، إذا حكولُه اجتماع الساعة ٩، يكونوا كلهم موجودين قبلها بدقايق.

لما رجع على عمّان، أول إشي لاحظه ريحة البلد، أصوات السيارات، الناس بتحكي بصوت أعلى، وحس بشعور إنه “ مكاني". بنفس الوقت، صار يشوف بعض الأشياء اللي متعود عليها بس بطريقه مختلفة.

صار يقدّر النظام بالنقل والمواعيد، ويتمنى لو جزء من هالثقافة يوصل لعنا.

تعلّم إنه أوروبا مش جنة ولا فيلم، هي مكان فيه إيجابيات وسلبيات، بس التجربة نفسها بتفتح مُخ الواحد وبتعلّمه يشوف حاله وبلده بطريقة أوضح.